मुंबई। मुंबईच्या रस्त्यावर पडलेले खड्डे आणि रस्त्यांची दुरुस्ती आठवडाभरात त्वरित न केल्यास पाठपुरावा आंदोलन करू, असा इशारा देणाऱ्या राष्ट्रवादी काँग्रेसने प्रदेश प्रवक्ते अ‍ॅड. अमोल मातेले यांच्या नेतृत्वाखाली मुंबई महानगर प्रदेश विकास प्राधिकरण अर्थात एमएमआरडीएलाही तुमच्या अखत्यारित येणारे खड्डे बुजवा, रस्ते दुरुस्ती करा, अशा आशयाचे निवेदन दिले आहे. मुंबईतील काही रस्ते हे एमएमआरडीएच्या अंतर्गत येत असल्याने एमएआरडीच्या सहआयुक्त राहुल कर्डिले यांना अ‍ॅड. अमोल मातेले यांच्या नेतृत्वाखाली राष्ट्रवादीच्या शिष्टमंडळाने निवेदन सादर करत खड्ड्यांचा निकाला लावा, असे सूचित करणारे निवेदन दिले आहे. याआधी राष्ट्रवादी काँग्रेसने प्रदेश प्रवक्ते अ‍ॅड. अमोल मातेले यांच्या नेतृत्वात मुंबई महापालिकेचे प्रमुख अभियंते रस्ते राजन तळकर यांची भेट घेवून निवेदन दिले आहे. पावसाळ्यात मुंबईच्या रस्त्यांवर खड्डेच खड्डे चोहीकडे झाल्याने वाहनचालकांना तासनतास वाहतूकोंडीत अडकून पडावे लागत आहे. एकीकडे पेट्रोल, डिझेलचे भाव गगनाला भिडले असताना वाहतूककोंडीत अडकून पडलेल्या मुंबईकरांना याचा प्रचंड मनस्ताप होतो आहे.
दरम्यान, कोरोना काळात आधीच आर्थिक परिस्थिती बिकट झालेल्या मुंबईकरांना वाहतूककोंडीच्या निमित्ताने नाहक भुर्दंड सोसावा लागत आहे. खड्डे आणि खराब रस्ते या कारणांमुळे मुंबईकर प्रचंड तणावाखाली वावरत आहेत. याचा मोठा उद्रेक होवून मुंबईकर रस्त्यावर उतरतील, असा इशारा राष्ट्रवादी काँग्रेसने महापालिकेचे प्रमुख अभियंते राजन तळकर यांना दिला होता. मुंबई महापालिकेच्या अर्थसंकल्पात रस्तेकामासाठी 1800 कोटींची तरतूद असतानाही मुंबईचे रस्ते खड्ड्यांत का, असा रोकडा सवाल अ‍ॅड. अमोल मातेले यांनी महापालिकेला दिलेल्या निवेदनाद्वारे उपस्थित केला होता.
