दिल्ली | प्रसिद्ध हिंदुस्तानी शास्त्रीय गायक उस्ताद गुलाम मुस्तफा खान यांना राष्ट्रपती रामनाथ कोविंद यांच्या हस्ते पद्मविभूषण पुरस्काराने सन्मानित करण्यात आले. राष्ट्रपती भवनाच्या दरबार हॉलमध्ये आयोजित शानदार कार्यक्रमात राष्ट्रपतींच्या हस्ते विविध क्षेत्रात उल्लेखनीय योगदान देणाऱ्या मान्यवरांना पद्म पुरस्काराने सन्मानित करण्यात आले. यात महाराष्ट्रातील ७ मान्यवरांचा यात समावेश आहे.
संगीत क्षेत्रातील योगदानासाठी पंडित अरविंद पारिख यांना पद्मभूषण, वैद्यकीय क्षेत्रातील योगदानासाठी डॉ. अभय व डॉ. राणी बंग यांना पद्मश्री पुरस्कार, शिक्षणतज्ज्ञ अरविंद गुप्ता यांना साहित्य व शिक्षण क्षेत्रातील योगदानासाठी तर क्रीडा क्षेत्रातील योगदानासाठी मुरलीकांत पेटकर यांना पद्मश्री पुरस्काराने सन्मानित करण्यात आले. सामाजिक क्षेत्रात दिलेल्या मोलाच्या योगदानासाठी संपत रामटेके यांना मरणोत्तर पद्मश्री पुरस्कार जाहीर झाला होता आज त्यांच्या वतीने पत्नी जया रामटेके यांनी हा पुरस्कार स्वीकारला.
यावेळी उपराष्ट्रती एम. व्यंकय्या नायडू, प्रधानमंत्री नरेंद्र मोदी ,केंद्रीय गृहमंत्री राजनाथ सिंह यांच्यासह विविध क्षेत्रातील मान्यवर उपस्थित होते.
