मुंबईतील कुलाबा-वांद्रे-एसईपीझेड कॅारिडोरमधील मेट्रो -3 मधील मेट्रो गाडीचे मॉडेल मुख्यमंत्री देवेंद्र फडणवीस यांच्या हस्ते वर्षा या शासकीय निवासस्थानी अनावरण झाले. मेट्रो तीनवरील या मार्गिकेला अॅक्वा लाईन असे नाव देण्यात आले आहे. यावेळी एमएमआरसीच्या व्यवस्थापकीय संचालक अश्विनी भिडे, तसेच प्रकल्प संचालक सुबोधकुमार गुप्ता, संचालक (प्रणाली) अजय कुमार भट्ट आदी वरिष्ठ अधिकारी उपस्थित होते.
एमएमआरसीएसने अॅलस्ट्रॅाम ट्रान्सपोर्ट इंडिया लिमिटेडला मेट्रोगाडी व तिच्या डब्यांच्या रचना व निर्मितीचे काम दिले आहे. यावेळी श्रीमती भिडे म्हणाल्या,“ऑलस्टॉम ट्रान्सपोर्ट इंडियाच्या श्री सिटी फॅक्टरीत यावर्षी नोव्हेंबरमध्ये गाड्यांचे उत्पादन सुरू होईल आणि एका वर्षाच्या आत पहिल्या ट्रेनचे आगमन अपेक्षित आहे. यावेळी मुंबई-मेट्रो रेल कॉर्पोरेशन-एमएमआरसीच्या अधिकारी व कर्मचाऱ्यांनी मुख्यमंत्री सहाय्यता निधीसाठी एकत्रित केलेला चार लाख रुपयांचा धनादेश व्यवस्थापकीय संचालक अश्विनी भिडे यांनी मुख्यमंत्री देवेंद्र फडणवीस यांच्याकडे सुपूर्द केला.
